Ուկրաինայում հակամարտության ավարտը մոտ է․ ՆԱՏՕ-ի գլխավոր քարտուղար
ՆԱՏՕ-ի գլխավոր քարտուղար Մարկ Ռյուտտեն El País-ին տված հարցազրույցում ասել է, որ տեսականորեն հնարավոր է Ուկրաինայում մարտական գործողությունների ավարտը մինչև տարվա ավարտը։ Նա դրական է պատասխանել լրագրողի համապատասխան հարցին՝ ընդգծելով, որ իրավիճակը չի ենթարկվում ճշգրիտ կանխատեսումների։
Ռյուտտեն նշել է, որ խաղաղության հաստատումը պահանջում է շարունակական բանակցություններ։ Նրա խոսքով՝ Ժնևում կայացած վերջին հանդիպումից հետո դեռ անհրաժեշտ են նոր քննարկումներ, ինչպես նաև առանձին խորհրդակցություններ ԵՄ-ի և ՆԱՏՕ-ի ներգրավմամբ։
«Միշտ դժվար է կանխատեսել, բայց անկեղծորեն հույս ունեմ, որ խաղաղությունը մոտ է»,– ասել է նա։
Հավելենք՝ ԱՄՆ վարչակազմը հայտնել էր Ուկրաինայի շուրջ հնարավոր կարգավորման նախաձեռնության մշակման մասին։ Մի շարք արտասահմանյան լրատվամիջոցների փոխանցմամբ՝ քննարկվող տարբերակների մեջ ենթադրաբար ներառվում են մի շարք տարածքային և ռազմական պայմաններ, սակայն այս տեղեկությունները պաշտոնապես չեն հաստատվել և ներկայում մնում են մամուլի հրապարակումների մակարդակում։
