Հայաստանում հոկտեմբերին զգալի գնաճ է նկատվել
Հայաստանում 2025 թվականի հոկտեմբերին 12–ամսյա գնաճը կազմել է 3,7%, իսկ նախորդ ամսվա նկատմամբ` 0.3%: Այս մասին NEWS.am-ը տեղեկացել է ՀՀ Վիճակագրական կոմիտեց։
Ըստ ներկայացված ցուցանիշների` վերջին մի քանի ամիսների ընթացքում ՀՀ–ում գնաճը մնում է ՀՀ կենտրոնական բանկի նպատակային ցուցանիշի վերին սահմաններում (3 +/-1 %)։ Դա պայմանավորված է որոշ ապրանքների գների չափավոր աճով, ինչպես նաև ծառայությունների ոլորտում արձանագրված գների աճով:
Լայն սպառման ապրանքներից մեկ տարվա ընթացքում ամենաշատը թանկացել են արևածաղկի բուսական յուղը (18,6 %) և սուրճը (12,6 %)։ Այս ապրանքախմբերում գների աճը պայմանավորված է եղել համաշխարհային գների աճով։ 12,3%–ով թանկացել է նաև կարագը։
2025թ. հոկտեմբերին 2024թ. հոկտեմբերի համեմատ հացի գինն աճել է 3.5%-ով, ալյուրինը՝ 6.0%-ով։
2025թ. հոկտեմբերին սեպտեմբերի համեմատ սպառողական գներն աճել են 0.1-0.6%-ով, այդ թվում՝ գնաճի համեմատաբար բարձր ցուցանիշներ արձանագրվել են Գյումրի և Եղեգնաձոր քաղաքներում: Երևանում գներն աճել են 0.3%-ով:
2025թ. հունվար-հոկտեմբերին սպառողական գների միջին ամսական հավելաճը կազմել է 0.1% (նախորդ տարվա համապատասխան ժամանակահատվածում արձանագրվել է 0.1% նվազում)»։
