Հայաստան-Ադրբեջան խաղաղության համաձայնագրի ստորագրման շուրջ ակտիվ բանակցություններ են ընթանում․ ՀՀ ԱԳՆ
Հայաստան-Ադրբեջան խաղաղության համաձայնագրի ստորագրման շուրջ բանակցությունները շարունակվում են, սակայն համաձայնագրի ստորագրման հստակ ժամկետ չկա։ Լրագրողների հետ ճեպազրույցում այս մասին ասել է ՀՀ արտաքին գործերի նախարարի տեղակալ Մնացական Սաֆարյանը։
Փոխնախարարը նշել է, որ կողմերի միջև շփումները շարունակական են։ Անդրադառնալով սահմանազատման գործընթացին՝ փոխնախարարը հավելել է, որ այն իրականացվում է երկու երկրների սահմանազատման հանձնաժողովների ղեկավարների մակարդակով։
«Մենք միշտ հաղորդագրություններով տարածում ենք այն ամենն, ինչ կատարվում է գործընթացում»,- ասել է Սաֆարյանը՝ ընդգծելով, որ աշխատանքները չեն դադարել։
Լրագրողների հարցին՝ արդյոք սահմանազատումը շարունակվելու է Սյունիքում, Սաֆարյանը պատասխանել է, որ եթե լինի զարգացում, անպայման կլինի հաղորդագրություն։
