3-ամյա Տիգրանի սպանության գործով հորը նոր մեղադրանք է առաջադրվել
Քննչական կոմիտեն հայտնել է, որ Ծափաթաղում 3-ամյա Տիգրանի սպանության մեջ մեղադրվող տղամարդուն, որը երեխայի հայրն է, մեղադրանք է առաջադրվել նաև ֆիզիկական ներգործության հատկանիշներով։ Այս մասին հայտնում է Aysor.am-ը:
Ըստ կոմիտեի՝ այս հատկանիշներով նախաձեռնված քրեական վարույթը միացվել է երեխայի սպանության դեպքի առթիվ սկսված վարույթին։ Նշանակվել են համապատասխան փորձաքննություններ, որոնց եզրակացությունները դեռևս չեն ստացվել։
Ավելի վաղ հաղորդվել էր, որ դեպքի օրը բռնության հետքեր են հայտնաբերվել սպանված Տիգրանի եղբոր դեմքին։ Քննչական կոմիտեն հայտնել է, որ ֆիզիկական ներգործության հատկանիշներով նախաձեռնված վարույթը վերաբերում է այդ դեպքին։
Հիշեցնենք` Գեղարքունիքի մարզի Ծափաթաղ գյուղի բնակիչ, 2022 թվականին ծնված Տիգրան Օվանեսովը կորել էր հոկտեմբերի 27-ին։ Երեխայի դին հայտնաբերվեց նոյեմբերի 2-ին Ծափաթաղ գյուղին հարակից Ջիլ գյուղի ցուցանակից մոտ 60 մետր հեռավորության վրա՝ դաշտամիջյան հատվածում։
ՀՀ ՆԳ նախարար Արփինե Սարգսյանը նոյեմբերի 3-ին հայտնեց, որ 3 տարեկան Տիգրանին, ըստ նախնական տվյալների, խեղդել է հայրը` Արմեն Օվանեսովը։ Ավելի ուշ հայտնի դարձավ, որ Արմեն Օվանեսովի նկատմամբ հանրային քրեական հետապնդում է հարուցվել սպանության հոդվածով, դատարանի որոշմամբ նա կալանավորվեց 2 ամսով։
