ՏԿԵ փոխնախարարը՝ ՌԴ-ում հայ բեռնատարների վարորդների գործունեության մասին

ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում ասել է, որ Ռուսաստանում հայ բեռնատարների վարորդների անարգել գործունեության վերաբերյալ որևէ իրավական ակտ դեռ չի ընդունվել։

«ԵԱՏՄ անդամ բոլոր երկրներում (բացառությամբ ՌԴ-ում և Բելառուսում) այդ խնդիրը բարձրաձայնվեց։ Մի քանի փուլ քննարկումներից հետո ռուս գործընկերները հայտնեցին, որ համապատասխան իրավական գործընթաց են սկսել այդ մասով, որ վարորդների համար այլ միգրացիոն ռեժիմ սահմանեն»,- ասել է Արմեն Սիմոնյանը՝ ընդգծելով՝ ՌԴ տրանսպորտի նախարարությունը ևս համապատասխան առաջարկություններով է հանդես եկել ՆԳ նախարարությանը և գործընթացը գնում է, սակայն այս պահին իրավական որևէ ակտ, որ ընդունված է, հայտնի չէ։

«Մեր գործընկերները հայտնում են, որ այդ ուղղությամբ աշխատանքներ տանում են»,- նշել է փոխնախարարը։