2-3 տարի առաջ շտապօգնությունն աշխատել է վնասով, չի ունեցել արտահագուստ, ռեանիմոբիլներ. Ավինյան
Երևանի քաղաքապետարանում անցկացված գործակարգավարական խորհրդակցության ընթացքում քաղաքապետ Տիգրան Ավինյանը հայտարարել է, որ շտապօգնության ծառայության որակը նկատելիորեն բարելավվել է, ինչը, նրա խոսքով, պարզ է դառնում նաև քաղաքացիների մեկնաբանություններից։
Ավինյանը նշել է, որ նախկինում առկա 141 միլիոն դրամ վնասը փոխարկվել է 168 միլիոն դրամ շահույթի։ Քաղաքապետը հիշեցրել է, որ առաջին խորհրդակցությունների ժամանակ շտապօգնության զանգերի 78 տոկոսն էր սպասարկվում, և դա հարցեր էր առաջացնում։ Նրա խոսքերով՝ այժմ այդ խնդիրը քննարկման առարկա այլևս չէ, և ենթադրվում է, որ պետք է սպասարկվի զանգերի 100 տոկոսը։
Նա ընդգծել է, որ Առողջապահության նախարարությունն ունի նախաձեռնություններ համապետական շտապօգնության արդիականացման ուղղությամբ։ Ավինյանի խոսքով՝ Երևանի փորձը կարող է ծառայել որպես արդյունավետ հիմք՝ ծառայության որոշակի ձևափոխման համար։ Միաժամանակ նա նշել է, որ խոսքը չի վերաբերում մայրաքաղաքի ծառայությունը այլ կառույցի փոխանցելուն, այլ միավորված հարթակում համագործակցելուն՝ ընդհանուր ծածկույթը ինտեգրելու նպատակով։
Քաղաքապետը հիշեցրել է, որ 2-3 տարի առաջ շտապօգնության զանգերի սպասարկումը կազմում էր 65-70 տոկոս, ծառայությունն աշխատում էր վնասով, չկար բավարար արտահագուստ, մեքենաների պարկը ամբողջական չէր, ինչպես նաև բացակայում էին ռեանիմոբիլները, անկանխիկ վճարումը և թվայնացված Արմեդ համակարգի ինտեգրումը։
