Ամերիկացի մի խումբ բարձրաստիճան գեներալներ կայցելեն Մոսկվա

Ամերիկացի մի խումբ բարձրաստիճան գեներալներ հաջորդ շաբաթվա վերջին կժամանեն Մոսկվա՝ քննարկելու Ուկրաինայի հարցով ԱՄՆ-ի տրամադրած խաղաղության նախագիծը, հաղորդում է The Guardian-ը՝ վկայակոչելով ամերիկյան աղբյուրներին: 

Ավելի վաղ անանուն ամերիկացի պաշտոնյան ABC-ին ասել էր, որ հավանական է, որ ԱՄՆ բանակի նախարար Դենիել Դրիսկոլը, ով վերջերս այցելել էր Կիև, հետագայում հանդիպում ունենա Ռուսաստանի ներկայացուցիչների հետ: Այդ մասին հայտնել է նաև The Wall Street Journal-ը։

Ռուսաստանի նախագահի մամուլի քարտուղար Դմիտրի Պեսկովը նոյեմբերի 20-ին պատասխանել է այդ հաղորդագրություններին, որ իրեն այդ մասին ոչինչ հայտնի չէ:

Դրիսկոլը Կիև էր ժամանել նոյեմբերի 19-ին՝ հանդիպելու Ուկրաինայի նախագահ Վլադիմիր Զելենսկու հետ։ Նա պետության ղեկավարին է ներկայացրել ԱՄՆ-ի խաղաղության ծրագրի 28 կետից բաղկացած նախագիծը։

Դրիսկոլին ուղեկցում էր մի թիմ, որում ընդգրկված էին բարձրաստիճան չորս աստղանի գեներալներ և մի քանի պաշտոնյաներ:

Նոյեմբերի 20-ին ամերիկյան Խաղաղության ծրագրի տեքստը հրապարակել է Գերագույն ռադայի պատգամավոր Ալեքսեյ Գոնչարենկոն, որի իսկությունն ավելի ուշ հաստատել Է Սպիտակ տունը: Ծրագիրը բաղկացած է 28 կետից, որոնց համաձայն Ղրիմը, Լուգանսկը և Դոնեցկը կճանաչվեն դե ֆակտո ռուսական տարածքներ, իսկ Խերսոնը և Զապորոժյեն կսառեցվեն շփման գծում, «ինչը նշանակում է դե ֆակտո ճանաչում շփման գծում»:

Ուկրաինան չի անդամակցի ՆԱՏՕ-ին, երկրում 100 օրվա ընթացքում ընտրություններ կանցկացվեն, փոխարենը երկիրը կստանա անվտանգության հուսալի երաշխիքներ։ Ռուսաստանը կվերաինտեգրվի համաշխարհային տնտեսության մեջ։ Պատժամիջոցների վերացումը քննարկվելու և համաձայնեցվելու է փուլ առ փուլ և անհատական կարգով, - ասված է ամերիկյան նախաձեռնության մեջ:

Ռուսաստանի նախագահ Վլադիմիր Պուտինն ասել է, որ Թրամփի ծրագիրը կարող է դրվել կարգավորման հիմքում: Նա պարզաբանել է, որ ռուսական կողմը ստացել է փաստաթուղթը, սակայն այն առարկայորեն չի քննարկվել, քանի որ Վաշինգտոնը չի ստացել դրա վերաբերյալ Կիևի համաձայնությունը: Պետության ղեկավարի խոսքով՝ Ուկրաինան և Եվրոպան մինչ օրս «երազում են Ռուսաստանին ռազմավարական պարտություն հասցնել մարտի դաշտում»:

Պուտինը նաև նշել է, որ Մոսկվան պատրաստ է բանակցությունների, «բայց նրան գոհացնում է իր ներկայիս դինամիկան»: