Ընտրության իրավունք կունենան միայն Հայաստանում բնակվող ՀՀ քաղաքացիները․ ՆԳ նախարարի պարզաբանումը

Ներքին գործերի նախարար Արփինե Սարգսյանը լրագրողների հետ զրույցում նշել է, որ ընտրական իրավունքի վերաբերյալ ներկայացված օրենսդրական փոփոխությունների տրամաբանությունն այն է, որ ընտրություններին մասնակցեն միայն այն քաղաքացիները, ովքեր ունեն մշտական և կայուն կապ պետության հետ։

Նրա խոսքով՝ այդ կապը առավել հստակ արտահայտվում է Հայաստանում մշտապես բնակվելով և երկրում կյանքը կազմակերպելով։

«Միջազգային պրակտիկայում ևս կան ռեզիդենտության սկզբունքով կարգավորումներ, երբ տարբեր իրավունքներ կապվում են տվյալ երկրում բնակության փաստի հետ»,– նշել է նախարարը՝ օրինակ բերելով նաև առողջության ապահովագրության համակարգերը։

Անդրադառնալով այն հարցին, թե արդյոք կան հաշվարկներ՝ արտերկրից քվեարկողների ազդեցության վերաբերյալ, Սարգսյանը նշել է, որ նախաձեռնությունը պայմանավորված չէ որևէ կոնկրետ դեպքով։ Նրա խոսքով՝ սա հանրային քննարկումների արդյունքում ձևավորված առաջարկ է, որի նպատակն է ավելի հստակ սահմանել ընտրական գործընթացների մասնակիցների շրջանակը։

Նախարարի խոսքով՝ նախագծով նախատեսվում է, որ ընտրություններին կարող են մասնակցել այն քաղաքացիները, որոնք ընտրություններից առաջ որոշակի ժամանակահատված բնակվել են Հայաստանում։ Նա հավելել է, որ նման մոտեցումը նպատակ ունի ապահովել «իրական ժողովրդի իշխանության» ավելի ճշգրիտ արտահայտում։

Սարգսյանը նաև ընդգծել է, որ սահմանափակումը չի նշանակում, թե պետությունը հրաժարվում է իր քաղաքացիներից, քանի որ պայմանները կարող են փոփոխվել և վերականգնվել հետագա ընտրությունների ժամանակ։

Նախագիծը ներկայացվել է արտահերթ կարգով քննարկման, սակայն նախարարի խոսքով՝ դրա շուրջ արդեն եղել են հանրային քննարկումներ և կարծիքների փոխանակում։