Վասիլիս Մարագոսը ԵՄ-Հայաստան գործընկերության մասին

Եվրոպական միությունը բարձր է գնահատում Հայաստանի հետ գործընկերությունը արդարադատության ոլորտում բարեփոխումների առաջխաղացման, օրենքի գերակայության ամրապնդման գործում։  

Այս մասին խոսել է «Եվրոպական դատախազների երկխոսության հայկական հարթակ» միջոցառման բացման արարողության ժամանակ Հայաստանում Եվրոպական միության դեսպան Վասիլիս Մարագոսը։

Նրա գնահատմամբ՝ վերջին տարիներին Հայաստանը լայնածավալ բարեփոխումներ է իրականացրել՝ արդիականացնելով իրավական և ինստիտուցիոնալ համակարգը, բարձրացնելով իրավապահ և դատախազական ծառայությունների արդյունավետությունը և դրանք համապատասխանեցնելով եվրոպական չափանիշներին։ 

Անդրադառնալով անցկացվող համաժողովի կարևորությանը՝ Վասիլիս Մարագոսը նշեց, որ գործընկերության միջոցով Եվրոպական միությունը և Եվրոպայի խորհուրդը շարունակում են համատեղ աշխատել՝ աջակցելու օրենքի գերակայությանը, ժողովրդավարական կառավարմանը, ինչպես նաև արդարադատության ինստիտուտներն ամրապնդող բարեփոխումներին: Նրա բնորոշմամբ՝ սա վերաբերում է ամբողջ Արևելյան գործընկերության տարածաշրջանին։ 

«Այսօր մեր առջև ծառացած մարտահրավերները չեն սահմանափակվում ազգային սահմաններով։ Հանցավոր ցանցերը միջազգային համագործակցություն են իրականացնում։ Մեր արձագանքը պետք է շատ լավ համակարգված լինի։Ես վերահաստատում եմ Եվրոպական միության ամուր աջակցությունն այս նախաձեռնությանը և մեր շարունակական գործընկերությանը Հայաստանի, ինչպես նաև Եվրոպայի խորհրդի հետ»,-ընդգծեց Վասիլիս Մարագոսը։