Հրապարակվել է պատգամավորների երդման նոր տեքստը

Հայաստանի խորհրդարանի պատգամավորի երդման տեքստը պետք է փոխվի։ Այդ մասին այսօր՝ հուլիսի 1-ին Ազգային ժողովի կանոնակարգ օրենքում փոփոխություններ կատարելու մասին օրինագծի քննարկման ընթացքում Պետաիրավական հարցերի մշտական խորհրդարանական հանձնաժողովի նիստում հայտարարել է խորհրդարանական հանձնաժողովի նախագահ, ՔՊ խմբակցության պատգամավոր Արուսյակ Ջուլակյանը։

Նա, մասնավորապես, ընթերցել է երդման նոր տեքստի նախագիծը։

«Հանուն Հայաստանի Հանրապետության հարատևության, անկախության, ինքնիշխանության և հզորացման՝ երդվում եմ բարեխղճորեն կատարել ժողովրդի ներկայացուցչի պարտականություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության պետականության ամրապնդմանը և շահերի պաշտպանությանը, անել ամեն ինչ քաղաքացիական համերաշխության, Հայաստանի Հանրապետության քաղաքացիների անվտանգության և բարեկեցության, մարդու իրավունքների և ազատությունների պաշտպանության համար: Փառք նահատակներին և կեցցե՛ Հայաստանի Հանրապետությունը», - ասված է երդման առաջարկվող տարբերակում։

Մինչդեռ պատգամավորի երդման գործող տեքստն ունի հետևյալ տեսքը․ «Հանուն համազգային նպատակների իրականացման, Հայրենիքի ամրապնդման և բարգավաճման՝ երդվում եմ բարեխղճորեն կատարել ժողովրդի առջև ստանձնած պարտավորություններս, պահպանել Հայաստանի Հանրապետության Սահմանադրությունն ու օրենքները, նպաստել Հայաստանի Հանրապետության ինքնիշխանության և շահերի պաշտպանությանը, անել ամեն ինչ՝ քաղաքացիական համաձայնության, ազգային և համամարդկային արժեքների պահպանման համար»։

Պատգամավորի խոսքով՝ երդման նոր տեքստն ավելի համահունչ է այսօրվա իրողություններին, պետականությանը և Հայաստանի գործող օրենսդրությանը։