ՀՀ պետական դրոշը պետք է տեղադրվի բոլոր բնակավայրերի մուտքերում

«Հայաստանի Հանրապետության դրոշի մասին» օրենքում լրացումներ կատարելու մասին» օրենքի նախագիծը քննարկվել է ԱԺ պետական-իրավական հարցերի մշտական հանձնաժողովի արտահերթ նիստում։

Հայաստանում այժմ բացակայում է հստակ իրավական կարգավորում, որը կպարտադրի պետական դրոշի առկայությունը բոլոր բնակավայրերի մուտքերի մոտ։ Գործնականում միասնական մոտեցում ու պարտադիր պահանջ չկա, և որոշ տեղերում դրոշները տեղադրվում են համայնքային նախաձեռնությամբ։ Այս մասին հուլիսի 1-ին կայացած ԱԺ պետական-իրավական հարցերի մշտական հանձնաժողովի արտահերթ նիստում հայտնել է «Քաղաքացիական պայմանագիր» խմբակցության պատգամավոր Ալխաս Ղազարյանը։ Նա առաջին ընթերցմամբ ներկայացրել է ««Հայաստանի Հանրապետության դրոշի մասին» օրենքում լրացումներ կատարելու մասին» օրենքի նախագիծը, որի համահեղինակն է ԱԺ նախագահ Ալեն Սիմոնյանի հետ։

Պատգամավորները հարցեր են ուղղել պետական դրոշի գործածման ընդհանուր կարգի և բնակավայրերում դրանց տեղադրման վայրի ընտրության վերաբերյալ, որոնց հիմնական զեկուցողը տվել է սպառիչ պատասխաններ։

Հարակից զեկույցով հանդես է եկել Պետական-իրավական հարցերի մշտական հանձնաժողովի անդամ Անուշ Քլոյանը, ով դրական է գնահատել օրենսդրական նախաձեռնությունը։

Գործադիրի դրական դիրքորոշումը հայտնել է ՀՀ տարածքային կառավարման եւ ենթակառուցվածքների նախարարի տեղակալ Առնակ Ավետիսյանը։ Փոխնախարարը նշել է, որ Կառավարության ներկայացրած առաջարկները նախագծի համահեղինակների կողմից ընդունվել են։

Հանձնաժողովը կողմ է քվեարկել և դրական եզրակացություն տվել օրենքի նախագծի լրամշակված տարբերակին։