Ռուսաստանի հետ շանտաժի լեզվով խոսելու փորձերը անընդունելի են. Զախարովա

Ռուսաստանի հետ շանտաժի լեզվով խոսելու փորձերն անընդունելի են, Մոսկվան պատրաստ է բանակցություններ վարել կառուցողական տրամադրված կողմի հետ, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Ուկրաինայի ԱԳՆ ղեկավար Անդրեյ Սիբիգայի վերջին հայտարարությունը։ 

«Մեզ համար նման մոտեցումը, ինչպես և Ռուսաստանի հետ շանտաժի, սպառնալիքների, վերջնագրերի լեզվով խոսելու փորձերը, կատեգորիկ անընդունելի են»,- ճեպազրույցի ժամանակ ասել է Զախարովան։ 

«Բանակցություններ ենք վարելու նրանց հետ, ովքեր պատասխանատվությամբ են մոտենում արդար և կայուն կարգավորման հասնելու խնդրին, ներկայացնում են կառուցողական առաջարկներ, որոնք հաշվի են առնում գետնի վրայի իրողությունները, նախորդ բանակցային փուլերի արդյունքները, Ալյասկայում ռուս-ամերիկյան գագաթնաժողովի արդյունքները, Ռուսաստանի սկզբունքային դիրքորոշումը հակամարտության վերջնական լուծման վերաբերյալ՝ դրա հիմնապատճառների անդառնալի վերացման հիման վրա»,- ընդգծել է դիվանագետը։