Վարչապետը 2026 թվականին կանխատեսում է քաղաքական դաշտի փոփոխություն

Վարչապետ Նիկոլ Փաշինյանը համոզված է, որ 2026 թվականի խորհրդարանական ընտրությունների արդյունքով քաղաքական դաշտից դուրս կմղվեն բոլոր այն գործիչները, որոնք, իր գնահատմամբ, Հայաստանի Հանրապետությունը տարել են «թակարդ» և երկար ժամանակ պահել այդ իրավիճակում։

«2026 թ. խորհրդարանական ընտրությունները պետք է լինեն հետևյալի դրսևորումը՝ նախորդող շրջանի քաղաքական էլիտայի բոլոր ներկայացուցիչները, որոնք ՀՀ-ն առաջնորդել ու տարել են դեպի թակարդ և պահել թակարդում, այդ ընտրությունների արդյունքում պետք է դուրս մղվեն և այլևս քաղաքական դաշտում տեղ չունենան։ Սա իմ կարծիքն է, և համոզված եմ, որ այդպես էլ պետք է տեղի ունենա», – նշել է վարչապետը։

Նրա խոսքով՝ «Մարդկանց հետ շփվում եմ, և մարդիկ արդեն զզվել են «նախկին-ներկա» բանավեճերից ու քննարկումներից»։

Քաղաքական խոսքի վերաբերյալ անդրադառնալով՝ Փաշինյանը ասել է, որ անհրաժեշտ է հրաժարվել այդ մտայնությունից և ձևավորել նորմալ քաղաքական գործընթացների կանոններ Հայաստանում՝ ընդգծելով. «Որտեղ հայհոյախոսությունը ընդհանրապես տեղ չունի, առավել ևս՝ քաղաքական քննարկումների բովանդակության մեջ»։

Նա նաև անդրադարձել է իր կողմից նման մոտեցումների կիրառմանը՝ նշելով. «Դրա համար էլ ես կիրակի օրերը գնում եմ, խորանի առաջ ծնկի եմ իջնում ու իմ մեղքերի համար թողություն եմ խնդրում»։