Ինչպես բացատրել այս մեդիալիպուտին, որ իրենց ոչ հայկական քիթը չխոթեն մեր երկրի գործերի մեջ․ Սիմոնյան
Պարզվում է, որ այժմ Ռուսաստանում շատ մտահոգված են հայկական կոնյակի ճակատագրով, ավելի ճիշտ ՝ «կոնյակ» անվանումը փրկելով։ Այս մասին տելեգրամյան իր ալիքում գրել է Ազգային ժողովի նախագահ Ալեն Սիմոնյանը։
«Եվ մեղավորը Հայաստանի ընտրված վարչապետ Փաշինյանն է։ Ինչպես պնդում է քարոզիչ Արտեմի Լեբեդևը, ինչպես հասկանում եմ, վկայակոչելով «ՌԻԱ Նովոստի»-ն, «Փաշինյանը շատ էժան որոշել է վաճառել իր կարծիքը», ինչպես նաև «Փաշինյանը վերցրել և մի քանի միլիոն եվրոյի դիմաց պարզապես վաճառել է իր կարծիքը և արգելում է սեփական երկրում կոնյակ արտադրել:
Իսկ ինչպես բացատրել այս մեդիալիպուտին, որ «կոնյակ» անվանումը վաղուց արտոնագրված մի բան է, և Հայաստանի սահմաններից դուրս այդ անվանումով արտադրանք վաճառել պարզապես չի կարելի։ Ինչպես ակնարկել իր կարծիքը էժան չվաճառող այս կերպարին, որ Հայաստանի կոնյակի գործարանը չի կարող իր արտադրանքը արտադրել «Բարի Կոլա» սկզբունքով՝ միայն ներքին շուկայի համար։
Ինչպես հիշեցնել նրան, որ Հայաստանի կոնյակի գործարանը շատ վաղուց՝ դեռ Փաշինյանից առաջ, հանձնվել է ֆրանսիական «Pernod Ricard» ընկերությանը, և, ինչպես ինքն է ասում, այստեղ պետք է ուղարկել միայն իրեն և բոլոր մյուսներին, ովքեր իրենց ոչ հայկական քիթը խոթում են մեր երկրի գործերի մեջ։
Հ.Գ. հաջորդ անգամ, երբ Լեբեդևը գա Զեմֆիրայի երևանյան համերգին կամ որևէ այլ, այսպես կոչված, արտասահմանյան գործակալի, առաջարկում եմ նրան անպայման այցելել նաև Երևանի կոնյակի գործարան»,- գրել է նա:
