Սպիտակ տունը զգուշացնող հայտարարություն է տարածել
Ամերիկայի միացյալ նահանգների ՀՆԱ-ն կարող է նվազել 2025 թվականի վերջին եռամսյակում, եթե կառավարական կառույցների աշխատանքի մասնակի դադարեցումը (շաթդաունը) շարունակվի։ Այս մասին հայտարարել է Սպիտակ տան Ազգային տնտեսական խորհրդի ղեկավար Քևին Հասսեթը՝ հանդես գալով CBS հեռուստաալիքով։
Նրա խոսքով՝ շաթդաունի հետևանքով օդային երթևեկության կառավարման համակարգում առաջացած աշխատակիցների պակասը կարող է հանգեցնել լուրջ խափանումների երկրի օդանավակայաններում, հատկապես տոնական օրերին։
«Եթե մարդիկ այդ օրերին չկարողանան ճանապարհորդել, ապա չորրորդ եռամսյակում կարող ենք տեսնել տնտեսական անկում», - ընդգծել է նա։
Հասսեթը նաև հիշեցրել է, որ Goldman Sachs բանկի հաշվարկներով՝ շաթդաունի հետևանքով ԱՄՆ-ը կարող է կորցնել մոտ 1,5 տոկոս ՀՆԱ, սակայն ըստ իր գնահատման՝ այդ ցուցանիշը կարող է լինել ավելի բարձր, եթե իրավիճակը չլուծվի առաջիկա շաբաթներին։
