Օրբանը Հունգարիային պատրաստում է նոր դարաշրջանի

Հունգարիայի վարչապետ Վիկտոր Օրբանը հայտարարել է, որ 21-րդ դարի Հունգարիայի տնտեսությունը հիմնվելու է տիեզերական, պաշտպանական և բարձր տեխնոլոգիական արդյունաբերությունների զարգացման վրա։ Նա այս մասին գրել է իր X (նախկին Twitter) հարթակի էջում՝ ամփոփելով ԱՄՆ կատարած այցը։

«Գլոբալ տնտեսությունը գտնվում է տեխնոլոգիական վերափոխման շեմին։ Մեր ամերիկացի գործընկերների հետ մենք Հունգարիային պատրաստում ենք այս նոր դարաշրջանին՝ կառուցելով տիեզերական, պաշտպանական և բարձր տեխնոլոգիական արդյունաբերությունների վրա հիմնված ժամանակակից տնտեսություն։ Միասին մենք կքայլենք դեպի ապագա»,– նշել է Օրբանը։

Հիշեցնենք, որ նոյեմբերի 7-ին Վիկտոր Օրբանը հանդիպել է ԱՄՆ նախագահ Դոնալդ Թրամփի հետ։ Քննարկվել են ուկրաինական հակամարտության կարգավորման և երկկողմ տնտեսական հարաբերությունների զարգացման հարցեր, այդ թվում՝ էներգետիկ ոլորտում համագործակցության հնարավորությունները։