Բելգրադում պատերազմի խորհրդանիշը կփոխարինեն շքեղ հյուրանոցով

Սերբիայի խորհրդարանը հաստատել է Բելգրադում գտնվող նախկին Գլխավոր շտաբի շենքի քանդման որոշումը։ Շենքը, որը վնասվել էր ՆԱՏՕ-ի հարվածներից 1999 թվականին, երկար տարիներ համարվում էր յուգոսլավական մոդեռնիստական ճարտարապետության նշանակալի օրինակ։ Սակայն այժմ այն զրկվել է մշակութային ժառանգության կարգավիճակից, ինչի արդյունքում բացվել է ճանապարհը նոր ներդրումային նախագծի համար։

Նոր համալիրի տեղում նախատեսվում է կառուցել բարձրակարգ հյուրանոց, որի ընդհանուր արժեքը գնահատվում է մոտ 500 միլիոն դոլար։ Տեղական լրատվամիջոցների տվյալներով՝ նախագծին առնչություն ունի ԱՄՆ նախագահ Դոնալդ Թրամփի ընտանիքը։ Շինարարությունը ներառելու է 175 հյուրանոցային համար, շուրջ 1500 բնակարան և հատուկ հիշատակի անկյուն։

Ընդդիմությունը քննադատել է որոշումը՝ այն համարելով անհարգալից պատմական վայրի նկատմամբ։

«Այն տեղում, որտեղ երբեմնի ընկնում էին ռումբեր, այժմ ուզում են բացել շամպայն»,– նշել են ընդդիմադիր ներկայացուցիչները։