Լարված իրավիճակ Մերձավանում. սպասվում է բողոքի ցույց՝ համայնքապետի սպանության գործի պատճառով

«Ապրելու երկիր» կուսակցության նախագահ Մանե Թանդիլյանը հաստատել է, որ Մերձավանում առաջիկա օրերին սպասվում է բնակիչների բողոքի ցույց՝ համայնքապետ Վոլոդյա Գրիգորյանի սպանության չբացահայտման հետ կապված, գրում է Aysor.am-ը:

Թանդիլյանի խոսքով՝ լարվածությունը պայմանավորված է համայնքապետ Վալոդյա Գրիգորյանի սպանության չբացահայտմամբ, և քաղաքացիները պահանջում են գործի ամբողջական բացահայտում։ 

Ախտոյանների հնարավոր վերադարձի և դրանով պայմանավորված լարվածության մասին Թանդիլյանը տեղեկություն չի ունեցել։ Նա ընդգծել է, որ սպանությունը կատարած անձը միայնակ չի գործել․ «Ունեցել է սատարողներ, խրախուսողներ, երաշխավորներ, ինչո՞ւ չէ՝ նաև կազմակերպիչներ։ Բազմաթիվ հարցեր մնում են չբացահայտված, և սա է պատճառը, որ քաղաքացիները հանգիստ չեն կարողանում լինել Փարաքարում, քանի որ նման ոճրագործությունը չպետք է մնա անպատիժ»։

Հիշեցնենք, որ սեպտեմբերի 23-ին սպանվել էր Փարաքար համայնքի ղեկավար Վոլոդյա Գրիգորյանը։ Նրա սպանությանը աջակցելու մեղադրանքով կալանավորվել է Նարեկ Օհանյանը՝ համայնքի նախկին ՔՊ-ական ղեկավար Մհեր Ախտոյանի հորաքրոջ որդին։ Դեպքից հետո Ախտոյանները լքել էին Մերձավանը, իսկ գյուղացիները ստորագրահավաք էին սկսել նրանց վտարելու պահանջով։

Ավելի վաղ՝ փետրվարին, Մհեր Ախտոյանի տան հարևանությամբ գտնվող գրասենյակի մոտ տեղի էր ունեցել խմբակային ծեծկռտուք, որի ընթացքում սպանվել էր Ախտոյանի հորաքրոջ որդին՝ Գրիգոր Ախտոյանը, ով Նարեկ Օհանյանի եղբայրն էր։ Ըստ պաշտոնական վարկածի՝ Վոլոդյա Գրիգորյանի սպանությունը կապված է այդ դեպքի հետ, սակայն այս տարբերակը միանշանակ չի ընդունվում հասարակության կողմից։