Պուտինը լուրջ խնդիր է անվանել ջրային ռեսուրսների հարցը

Ռուսաստանի նախագահ Վլադիմիր Պուտինը նոյեմբերի 1-ին հանդիպել է կլիմայական հարցերով իր հատուկ ներկայացուցիչ Ռուսլան Էդելգերիևի հետ, ով ներկայացրել է զեկույց՝ նվիրված ջրային ռեսուրսների կառավարման և կլիմայական մարտահրավերների փոխկապակցվածությանը։

Էդելգերիևի խոսքով՝ ջրային խնդիրներն այսօր դարձել են կլիմայական բանակցությունների անբաժան մասը։ Նա նշել է, որ այս թեման սերտորեն կապված է կլիմայի փոփոխության դեմ պայքարի գործընթացների հետ, ինչը երբեմն սահմանափակում է պետական ինքնիշխանությունը՝ հատկապես զարգացող երկրներում, որոնք ունեն մեծ ջրային կամ ձկնային պաշարներ։

Պուտինը հանդիպման ընթացքում շեշտել է, որ անհրաժեշտ է պաշտպանել Ռուսաստանի շահերը միջազգային բանակցություններում՝ հաշվի առնելով համաշխարհային բնապահպանական օրակարգի պահանջները։ Նա նաև ընդգծել է երկրի ջրային ռեսուրսների արդյունավետ օգտագործման կարևորությունը։

«Ջրային պաշարների խնդիրը դառնում է ավելի սուր՝ հատկապես մեր հարևան երկրների համար։ Ռուսաստանում իրավիճակը վերահսկելի է, սակայն ԱՊՀ շատ երկրներում այս հարցը մնում է լուրջ մարտահրավեր», - նշել է նախագահը։