Փոխքաղաքապետը՝ վարորդներին աշխատանքից հեռացնելու և հետ ընդունելու մասին
Երևանի քաղաքապետի տեղակալ Սուրեն Գրիգորյանն ասուլիսի ժամանակ անդրադարձավ տարեվերջին իրենց պարտականությունները կատարելուց հրաժարվող վարորդներին հեռացնելուց հետո կրկին աշխատանքի ընդունելու մասին խոսակցություններին:
«Էնպես չէ, որ ոչ մեկի չենք ընդունել, եղել է վարորդ, որ եկել է բացատրել, որ նախաձեռնող չի եղել, մասնակցել է սոլիդարության սկզբունքով: Այդպիսի մարդկանց ետ ընդունելու դեպքեր եղել են, բայց շատ քիչ քանակով: Մեծ մասը, ովքեր ազատվել են, չեն վերականգնվել, և հընթացս լինում են դեպքեր, որ պարտականությունների ոչ պատշաճ կատարման շրջանակներում վարորդները աշխատանքից ազատվում են, և լինում է, որ աշխատանքային պարտականությունները պատշաճ կատարելու համար խրախուսվում են»,- նշեց Սուրեն Գրիգորյանը:
Հիշեցնենք՝ դեկտեմբերի 3-ին հասարակական տրանսպորտի վարորդներն գործադուլ են արել, որի հետևանքով վարորդներ էին աշխատանքից ազատվել։
