Անահիտ Ավանեսյանը՝ իր և ամուսնու հավատքի տարբերությունների մասին

Առողջապահության նախարար Անահիտ Ավանեսյանը վստահեցրել է, որ մկրտվել է Սուրբ Զորավոր եկեղեցում և Հայ առաքելական եկեղեցու հետևորդ է, արձագանքելով տեղեկություններին, թե նա մասնակցել է կարգալույծ քահանայի մատուցած պատարագի։

«Հրապարակումներ անողները որտեղի՞ց գիտեն, որ ես Սուրբ Առաքելական եկեղեցու հետևորդ չեմ։ Ես մկրտված եմ, մկրտվել եմ Սուրբ Զորավոր եկեղեցում և Հայ առաքելական եկեղեցու հետևորդ եմ», - ասել է Ավանեսյանը լրագրողների հետ զրույցում։

Նա անդրադարձել է նաև իր ամուսնու՝ Ավետարանչական եկեղեցու հետևորդ լինելու մասին դիտարկմանը՝ նշելով․ «Իմ ամուսինն ավետարանչական է, բայց դա որևէ առնչություն չունի։ Մեր հարաբերություններում բախում չկա, ապրում ենք սիրով և խաղաղությամբ, ունենք երեք երեխա»։

Ավանեսյանը հավելել է, որ առաջիկա կիրակի նույնպես այցելելու է Հովհաննավանք։

«Գնալու եմ, որովհետև հասկանում եմ, որ չի կարելի համայնքին միայնակ թողնել անարդարության առաջ», - ասել է նա։