Վաղարշապատում «Գյումրի 2» տարբերակը բացառվում է. Դավիթ Խուդաթյան

Տարածքային կառավարման և ենթակառուցվածքների նախարար Դավիթ Խուդաթյանը հայտարարեց, որ «Քաղաքացիական պայմանագիր» կուսակցությունը Արգիշտի Մեխակյանի ղեկավարությամբ առաջիկա ընտրություններին մասնակցում է բացարձակ մեծամասնություն ստանալու՝ 50 տոկոս պլյուս մեկ ձայն ապահովելու նպատակով։

Ազգային ժողովում լրագրողների հետ զրույցում Խուդաթյանը նշեց, որ իրենց կուսակցությունը չի նախատեսում Վաղարշապատում կրկնել «Գյումրի 2» տարբերակը՝ ընդգծելով, որ իշխանությունը պետք է ձևավորվի ընտրողների վստահության միջոցով։

Նախարարը հիշեցրեց, որ ՔՊ թիմը 2018 թվականից հետո մշտապես հաղթել է Վաղարշապատի և Խոյի տարբեր մակարդակի ընտրություններում։ Նրա խոսքով՝ այդ հաղթանակներից շատերը գրանցվել են հենց Արգիշտի Մեխակյանի գլխավորությամբ․ «2018-ին պարոն Մեխակյանը եղել է Արմավիրի մարզում ամենաշատ ձայներ ստացած թեկնածուն և հետագայում ընտրվել է Խոյ համայնքի ղեկավար՝ ստանալով բացարձակ մեծամասնություն»։

Խուդաթյանը հավելեց, որ ընդդիմությունը նախկին ընտրություններում մի քանի անգամ պարտվել է ինչպես Վաղարշապատում, այնպես էլ Խոյում․ «Նրանք արդեն մի քանի ընտրություններ են պարտվել՝ 2018-ին, 2021-ին և հետագայում ևս։ Վաղարշապատում ընդդիմությունը, կարելի է ասել, պարտությունների օլիմպիական չեմպիոն է»։

Նրա խոսքով՝ Արգիշտի Մեխակյանը վաստակել է քաղաքացիների վստահությունը, ինչը մեծացնում է ՔՊ-ի հնարավորությունները առաջիկա ընտրություններում։