Գազն ու նավթը թանկացել են․ Եվրահանձնաժողովի նախագահը մանրամասնում է

Եվրոպական միության երկրները Մերձավոր Արևելքում սկսված հակամարտության ֆոնին զգալիորեն ավելի բարձր գներով են վճարում ներմուծվող էներգակիրների համար։ Եվրոպական հանձնաժողովի նախագահ Ուրսուլա ֆոն դեր Լայենի խոսքով՝ վերջին զարգացումները կրկին ցույց են տվել տարածաշրջանային անկայունությունից ԵՄ կախվածության ազդեցությունը։

Նրա ներկայացրած տվյալների համաձայն՝ հակամարտության սկսվելուց հետո բնական գազի գինը աճել է մոտ 50 տոկոսով, իսկ նավթի գինը՝ շուրջ 27 տոկոսով։ Գնաճը անմիջապես անդրադարձել է եվրոպական երկրների ներմուծման ծախսերի վրա։

Ֆոն դեր Լայենը նշել է, որ եթե այդ աճը հաշվարկվի եվրոյով, ապա ընդամենը տասը օր տևած ռազմական լարվածությունը եվրոպացի հարկատուների համար արդեն շուրջ 3 միլիարդ եվրոյի լրացուցիչ ծախս է առաջացրել՝ կապված հանածո վառելիքի ներմուծման հետ։

Եվրահանձնաժողովի նախագահի գնահատմամբ՝ քանի դեռ Եվրոպան շարունակում է զգալի ծավալներով հանածո վառելիք ներմուծել անկայուն տարածաշրջաններից, ԵՄ-ն կմնա խոցելի էներգետիկ շուկայի տատանումների նկատմամբ և կախված արտաքին մատակարարումներից։