Tomahawk հրթիռների փոխանցումը Ուկրաինային չի փոխի իրավիճակը ճակատում. Էստոնիայի ՊՆ նախարար
Էստոնիայի պաշտպանության նախարար Հաննո Պևկուր չի կարծում, որ ԱՄՆ-ի կողմից Ուկրաինային «Tomahawk» տիպի հրթիռների փոխանցումը կազդի ռազմական գործողությունների ընթացքի վրա։ «Չեմ կարծում… դա շրջադարձային պահ չի լինի», — նշել է նա իսպանական El País թերթին տված հարցազրույցում՝ պատասխանելով հարցին, թե արդյոք այս հրթիռների ստացումը կարող է փոխել իրավիճակը մարտական գործողությունների գծում։
Ռուսաստանի նախագահ Վլադիմիր Պուտինը հոկտեմբերի 23-ին հայտարարել էր, որ եթե Ուկրաինան օգտագործի «Tomahawk» հրթիռները Ռուսաստանի տարածքի դեմ, Մոսկվայի պատասխանը «լինելու է խիստ, եթե ոչ՝ զարմացնող»։ Լրագրողների խնդրանքով նախագահի մամուլի քարտուղար Դմիտրի Պեսկովը մեկնաբանել էր Պուտինի խոսքերը՝ նշելով, որ դրանք «բավականին հստակ և լրացուցիչ բացատրության կարիք չունեն»։
Ավելի վաղ ԱՄՆ նախագահ Դոնալդ Թրամփը ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ ընդգծել էր, որ «Tomahawk» հրթիռների կիրառման փորձը հատուկ է միայն Միացյալ Նահանգներին և այն չեն պատրաստվում փոխանցել որևէ այլ պետության։
