Հայաստանը պետք է խնամք տանի հաստատված խաղաղության նկատմամբ. Փաշինյան

Հայաստանի վարչապետ Նիկոլ Փաշինյանը շեշտում է՝ խաղաղությունն Ադրբեջանի հետ արդեն փաստ է, և անհրաժեշտ է այն դարձնել կայուն ու ինստիտուցիոնալ:

Նիկոլ Փաշինյանն Ազգային ժողովում «ՀՀ 2026 թվականի պետական բյուջեի մասին» օրենքի նախագծի քննարկման ընթացքում հայտարարեց, որ խաղաղությունը Հայաստանի և Ադրբեջանի միջև պետք է դիտարկվի որպես հաստատված փաստ։ Նա ընդգծեց՝ Հայաստանին դեռ անծանոթ է խաղաղության մեջ ապրելու փորձը, քանի որ անկախության առաջին օրերից երկիրը գտնվել է կոնֆլիկտային իրավիճակում։

Փաշինյանի խոսքով՝ անհրաժեշտ է ձևավորել խաղաղության պայմաններին համարժեք մտածողություն և արժեքային համակարգ։ «Մենք պետք է խնամք տանենք հաստատված խաղաղության նկատմամբ, որպեսզի այն ամրապնդվի և դառնա ինստիտուցիոնալ»,– նշեց վարչապետը։

Նա նաև հավելեց, որ այս ուղղությամբ շարունակվում են աշխատանքները Ադրբեջանի հետ՝ ինչպես դիվանագիտական խողովակներով, այնպես էլ տարբեր մակարդակներում։ Փաշինյանը հիշեցրեց, որ վերջին շրջանում տեղի են ունեցել շփումներ՝ ինչպես խորհրդարանական, այնպես էլ փոխվարչապետերի մակարդակով, և ամենօրյա աշխատանք է իրականացվում հեռավար ձևաչափով։

«Եթե նախկինում Ադրբեջանի հետ մեր հարաբերությունները կոնֆլիկտի շրջանակում էին, ապա այսօր մեր ամենօրյա աշխատանքի անբաժանելի մասը խաղաղությունն է»,– ասաց Փաշինյանը։