Երևանում հավանաբար մոռացել են՝ Ռուսաստանը զգալի ներդրումներ է կատարել․ Զախարովա

Ռուսաստանը վերահաստատում է իր հանձնառությունը հայկական երկաթուղու կառավարմանը և դրա ենթակառուցվածքներում ներդրումներ կատարելուն, այս մասին հայտարարել է Ռուսաստանի արտաքին գործերի նախարարության խոսնակ Մարիա Զախարովան։

«Սրանք տարօրինակ հայտարարություններ են. դրանք դժվար թե ընդունելի լինեն։ Ռուսաստանը հետևողականորեն պաշտպանում է տարածաշրջանային բոլոր տրանսպորտային և տնտեսական հաղորդակցությունների ապաշրջափակումը», - ասել է նա։

Նրա խոսքով՝ դրան հասնելու համար մեծ աշխատանք է կատարվել Ռուսաստանի, Հայաստանի և Ադրբեջանի փոխվարչապետերի համանախագահությամբ եռակողմ աշխատանքային խմբի շրջանակներում։

«Հարավկովկասյան երկաթուղիների ցանցը կառավարվում է «Հարավկովկասյան երկաթուղիներ» ՓԲԸ-ի կողմից ավելի քան 20 տարի։ Այս ընթացքում ռուսական ընկերությունը ոչ միայն հետևողականորեն կատարել է կոնցեսիոն պայմանագրի բոլոր պայմանները, այլև՝ ինչը, հավանաբար, մոռացել են Երևանում, զգալի ներդրումներ է կատարել ենթակառուցվածքների և շարժակազմի մեջ՝ ապահովելով մեծ թվով աշխատատեղեր, ինչը պետք է հաշվի առնեն նաև Հայաստանում նրանք, ովքեր ցանկանում են բարձրաձայնել այս հարցի շուրջ», - ասաց Զախարովան։

Նրա խոսքով՝ ռուսական օպերատորը մի կառույց է, որը չի զրկում հանրապետությանը մրցակցային առավելություններից, այլ ստեղծում է դրանք։

«Երևանի խնդրանքով Հայաստանը Թուրքիային և Ադրբեջանին կապող երկաթուղու երկու հատվածների վերականգնման վերաբերյալ մեր դիրքորոշումը հստակ արտահայտել է Ռուսաստանի փոխվարչապետ Ալեքսեյ Օվերչուկը։ Մենք կպահպանենք այս դիրքորոշումը», - ընդգծել է Զախարովան։

Հիշեցնենք՝ Օվերչուկը հայտարարել է, որ վերականգնվող երկաթուղային հատվածների ընդհանուր երկարությունը մոտավորապես 1.6 կմ և 12.4 կմ է, և սպասվում է, որ այս նախագծի իրականացման տեխնիկական, ֆինանսական և այլ եղանակները կորոշվեն Երևանի և Մոսկվայի միջև բանակցությունների ընթացքում։