Սլովակիան կաջակցի Ռուսաստանի դեմ պատժամիջոցներին

Սլովակիայի վարչապետ Ռոբերտ Ֆիցոն այսօր երեկոյան կայանալիք ԵՄ գագաթնաժողովից առաջ կհանդիպի Գերմանիայի կանցլեր Ֆրիդրիխ Մերցի հետ, հաղորդում է Denník N-ն։

Նրանք կքննարկեն էներգակիրների գները և 2035 թվականից ներքին այրման շարժիչով մեքենաների վաճառքի արգելքը։ Ֆիցոն, հավանաբար, կաջակցի Ռուսաստանի դեմ պատժամիջոցներին, եթե Սլովակիայի պահանջները ներառվեն գագաթնաժողովի եզրակացություններում։

Ֆիցոն Մերցի հետ հանդիպման մասին հայտարարել է այսօր առավոտյան խորհրդարանի Եվրոպական կոմիտեի նիստում։ Ավելի վաղ Ֆիցոն հայտարարել էր, որ կարգելափակի Ռուսաստանի դեմ ուղղված պատժամիջոցների 19-րդ փաթեթը, եթե ԵՄ-ն զիջումների չգնա ավտոմոբիլային արդյունաբերության հարցում։ Ֆիցոյի խոսքով՝ Սլովակիայի պահանջները արդեն ներառվել են գագաթնաժողովի եզրակացությունների նախագծում։

«Եթե մենք տեսնենք այդ եզրակացությունները, որոնք մենք ձեռք բերեցինք, ես ևս մեկ անգամ կվերանայեմ դրանք այսօր երեկոյան, և հավանաբար կտեղեկացնեմ կանցլեր Մերցին, որ մենք համաձայն ենք 19-րդ փաթեթին, որը չի ազդում մեր վրա, բայց բանակցությունների լավ գործիք է հանդիսանում»,- ասել է նա պատգամավորներին։

2035 թվականից ներքին այրման շարժիչով մեքենաների վաճառքն արգելելու վերաբերյալ ԵՄ-ում քննարկումները, ինչպես սպասվում է, կհանգեցնեն փոխզիջման: Սլովակիան պնդում է այս սահմանափակման մեղմացման վրա:

Ֆիցոյի խոսքով՝ ԵՄ-ն կքննարկի նաև ածխածնի արտանետումների քվոտաների համակարգի ընդլայնումը։