Վատ ավարտ՝ կոկաինից կախվածություն ունեցող ծաղրածուի և Թրամփի համար․ Մեդվեդևը՝ Tomahawk հրթիռներն Ուկրաինային տրամադրելու մասին

Ռուսաստանի Անվտանգության խորհրդի փոխնախագահ Դմիտրի Մեդվեդևը իր Telegram ալիքում Ուկրաինայի նախագահ Վլադիմիր Զելենսկուն անվանել է կոկաինից կախվածություն ունեցող ծաղրածու և անդրադարձել նաև Թրամփի՝ Tomahawk հրթիռներն Ուկրաինային տրամադրելու մտադրությանը։

«Այդ հրթիռների մատակարարումը կարող է վատ ավարտ ունենալ բոլորի համար։ Եվ առաջին հերթին՝ հենց Թրամփի համար։ Tomahawks-ի արձակումն իրականացնելու է ոչ թե բանդերական Կիևը, այլ հենց ԱՄՆ-ը»,- ասել է Մեդվեդևը։

Ավելի վաղ Դաշնության խորհրդի միջազգային հարաբերությունների հանձնաժողովի նախագահի առաջին տեղակալ Վլադիմիր Ջաբարովը զգուշացրել էր, որ եթե Կիևին մատակարարվեն Tomahawk թևավոր հրթիռներ, կտուժի ոչ միայն Ուկրաինան, այլ նաև ԱՄՆ-ն։ Սենատորի խոսքով՝ այդ մատակարարումները, հավանաբար, տեղի չեն ունենա, քանի որ ԱՄՆ նախագահ Դոնալդ Թրամփը հասկանում է պատասխանատվության չափը։