Ազգային ժողովն ընդունեց Հայաստանի և Ադրբեջանի միջև խաղաղության հաստատման մասին հայտարարությունը

Ազգային ժողովն արտահերթ նիստում ընդունել է «Քաղաքացիական պայմանագրի» հեղինակած «Հայաստանի և Ադրբեջանի միջև խաղաղության հաստատման վերաբերյալ» հայտարարությունը։

Նախագծին կողմ քվեարկեց 64, ձեռնպահ` 2 պատգամավոր։ Ձեռնպահ քվեարկեցին անկախ պատգամավորներ Հովիկ Աղազարյանն ու Հակոբ Ասլանյանը։

Ավելի վաղ «Հայաստան» խմբակցությունը հայտարարել էր, որ չի մասնակցելու այդ քննարկմանը։

Նշենք, որ այսօր ԱԺ հերթական նիստի ավարտին հայտնի դարձավ, որ «Քաղաքացիական պայմանագիր» խմբակցությունը որոշել է արտահերթ նիստ հրավիրել խմբակցության ղեկավար Հայկ Կոնջորյանի նախաձեռնած հայտարարության տեքստի քննարկման համար։

Կոնջորյանն իր ելույթում նշել է, որ այսպիսով Ազգային ժողովն իր աջակցությունն է հայտնում օգոստոսի 8-ին Վաշինգտոնում ձեռք բերված պայմանավորվածություններին։

Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել (99 տարով` ևս 99 տարով երկարաձգելու հնարավորությամբ), որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան:

Փաշինյանն էլ իր հերթին հայտարարել է, որ Հայաստանը հողը ոչ թե 99 տարով վարձակալության է տալիս ամերիկյան կողմին, այլ տալիս է կառուցապատման իրավունք։