Հռոմի Պապը քննադատել է ԱՄՆ-ում ներգաղթյալների նկատմամբ «անմարդկային» վերաբերմունքը. Reuters

Հռոմի Լևոն XIV Պապը խիստ քննադատել է ԱՄՆ նախագահ Դոնալդ Թրամփի ներգաղթային քաղաքականությունը՝ կասկածի տակ դնելով դրա համապատասխանությունը Կաթոլիկ Եկեղեցու՝ կյանքի պաշտպանության սկզբունքներին՝ գրում է Reuters-ը:

«Եթե մեկն ասում է, որ ես դեմ եմ աբորտներին, բայց համաձայն եմ Միացյալ Նահանգներում ներգաղթյալների նկատմամբ անմարդկային վերաբերմունքի հետ, արդյո՞ք նա կյանքի պաշտպանության կողմնակից է»,- լրագրողներին ասել է հովվապետը:

Կաթոլիկ Եկեղեցու դիրքորոշումն այն մասին, որ կյանքը սուրբ է բեղմնավորումից մինչև բնական մահ, 1,4 միլիարդ հետևորդ ունեցող դավանանքի ամենաուժեղ դրույթներից մեկն է:

Սպիտակ տունը հայտարարել է, որ Թրամփն ընտրվել է իր բազմաթիվ խոստումների շնորհիվ, այդ թվում՝ հանցագործություններ կատարած անօրինական ներգաղթյալներին արտաքսելու մասին։

«Նա կատարում է ամերիկացի ժողովրդին տրված խոստումը»,- ասվում է մամուլի փոխխոսնակ Աբիգեյլ Ջեքսոնի հայտարարության մեջ:

Լրատվականը նշել է, որ մայիսին հանգուցյալ Հռոմի Պապ Ֆրանցիսկոսին փոխարինած Լևոն Պապը շատ ավելի զուսպ է իր արտահայտություններում, քան հանգուցյալ հովվապետը, որը հաճախ էր քննադատում Թրամփի վարչակազմին: