Իրանի ԱԳՆ-ն ՝«Եվրաեռյակի» կողմից պատժամիջոցների վերականգնման մեխանիզմի գործարկման մասին

Իրանի արտգործնախարարությունը հինգշաբթի հայտարարություն է տարածել, որում քննադատում է Մեծ Բրիտանիային, Ֆրանսիային և Գերմանիային, այսպես կոչված «Եվրաեռյակի»-ին, Իրանի նկատմամբ ՄԱԿ-ի պատժամիջոցները վերականգնելու արագ արձագանքման մեխանիզմի, այսպես կոչված «snapback»-ի գործարկման համար, հաղորդում է իրանական Mehr գործակալությունը։

«Իրանի Իսլամական Հանրապետության արտաքին գործերի նախարարությունը կտրականապես մերժում և ամենախիստ կերպով դատապարտում է 2231 (2015) բանաձևի վերաբերյալ Ֆրանսիայի, Գերմանիայի և Միացյալ Թագավորության (E3) կողմից Անվտանգության խորհրդում արված անօրինական հայտարարությունը»,- ասված է Իրանի ԱԳՆ հայտարարության մեջ։

«Այդ անհիմն գործողությունը, որը հակասում է Գործողությունների համատեղ համապարփակ ծրագրի (JCPOA) վեճերի լուծման մեխանիզմին (DRM), չեղյալ հայտարարված բանաձևերը վերականգնելու անօրինական և անհիմն փորձ է և ակնհայտորեն խախտում է 2231 (2015) բանաձևը։ Ինչպես նշվել է ՄԱԿ-ի Անվտանգության խորհրդին ուղղված բազմաթիվ նախորդ հաղորդագրություններում, երեք եվրոպական երկրները ո՛չ իրավական, ո՛չ էլ բարոյական իրավունք ունեն կիրառել այսպես կոչված անհապաղ արձագանքման մեխանիզմը։ Հետևաբար, նրանց հայտարարությունը անվավեր է և իրավական ուժ չունի»,- ասված է հայտարարության մեջ։

Նախարարությունը նշել է նաև, որ «Եվրաեռյակի» քայլը կվնասի Ատոմային էներգիայի միջազգային գործակալության հետ Իրանի կապերին և կխաթարի ՄԱԿ-ի Անվտանգության խորհրդի հեղինակությունը։