Թեհրանը մեղադրում է Մոսկվային դավաճանության մեջ
Ռուսաստանը Իսրայելին հետախուզական տվյալներ է տրամադրել Իրանի հետ 12-օրյա պատերազմի ժամանակ, ասել է Իրանի «Քաղաքական նպատակահարմարության» խորհրդի անդամ Մոհամմադ Սադրը։ Այս մասին հաղորդել է «Ալ Արաբիա» հեռուստաալիքը։
«Ռուսաստանը Իսրայելին տեղեկատվություն է տրամադրել Իրանում ՀՕՊ համակարգերի տեղակայման մասին», - Սադրի խոսքերն է մեջբերում «Ալ Արաբիան»։
Լրատվամիջոցների փոխանցմամբ՝ խորհրդի անդամը նաև ասել է, որ Իրան-Իսրայել 12-օրյա պատերազմը «ցույց տվեց, որ Մոսկվայի հետ ռազմավարական դաշինքն անօգուտ է»։ Սադրը ընդգծել է, որ Ռուսաստանը S-400-ը վաճառել է ՆԱՏՕ-ի անդամ Թուրքիային, բայց երբեք համակարգերը չի վաճառել Իրանին, որի հետ այս տարվա սկզբին երկու երկրների միջև ռազմավարական գործընկերության համաձայնագիր է ստորագրել։
Ասրիրանը գրում է, որ Սադրը կոչ է արել պահպանել հարաբերությունները Ռուսաստանի հետ, բայց չվստահել նրան։
