Ապացույց չենք ունեցել, որ Ադրբեջանը օգնություն է ցուցաբերել Իսրայելին պատերազմի ժամանակ․ Լարիջանին
Մինչ օրս մենք որևէ ապացույց չենք ունեցել, որ Ադրբեջանը օգնություն է ցուցաբերել Իսրայելին Իրանում 12-օրյա պատերազմի ժամանակ։ Այս մասին հայտարարել է Իրանի Ազգային անվտանգության գերագույն խորհրդի քարտուղար Ալի Լարիջանին։ Նրա խոսքերը մեջբերել են իրանական լրատվամիջոցները։
Լարիջանին ընդգծել է, որ Բաքվի հայտարարությունները ցույց են տալիս, որ Իրանի դեմ թշնամական գործողություններ չեն ձեռնարկվել։
«Ոմանք տարբեր հայտարարություններ են անում, բայց նրանք, ովքեր դա պնդում են, պետք է մեզ տրամադրեն ճշգրիտ ապացույցներ և տվյալներ։ Մենք դեռևս նման տվյալներ չունենք։ Ադրբեջանի կառավարությունն ինքն է բացահայտ հայտարարում, որ նման բան տեղի չի ունեցել, և մենք որևէ ապացույց չունենք ներկայացնելու։ Պետք է ընդգծել, որ Ադրբեջանը մուսուլմանական հարևան երկիր է և շատ մոտ է մեզ մշակութային կապերով, այն մեր բարեկամն է», - նշել է Լարիջանին։
