Սա լրջագույն գործարք է, որ կնքեցինք այսօր. Նիկոլ Փաշինյան
Խաղաղության համաձայնագրի նախաստորագրումը ճանապարհ կհարթի մեր երկրների միջև տասնամյակներ տևած հակամարտությանը վերջ դնելու համար և կբացի նոր դարաշրջան՝ հիմնված միմյանց ինքնիշխանության և տարածքային ամբողջականության նկատմամբ լիակատար հարգանքի վրա։ Այս մասին Սպիտակ տանը ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի հետ հանդիպմանը ասաց ՀՀ վարչապետ Նիկոլ Փաշինյանը։
«Այսօր մենք հասել ենք կարևոր հանգրվանի Հայաստան-Ադրբեջան հարաբերություններում: Մենք անցյալի պատմությունից ավելի լավ պատմություն գրելու հիմքեր ենք դնում»,- ասաց վարչապետը։
Նիկոլ Փաշինյանն ընդգծեց, որ սա լրջագույն գործարք է, որ կնքեցին այսօր:
«Սա հաջողություն է մեր երկրների, տարածաշրջանի և աշխարհի համար, քանի որ ավելի խաղաղ տարածաշրջանը՝ նշանակում է ավելի անվտանգ աշխարհ: Մեկ նախադասությամբ սա կարելի է բնութագրել այսպես՝ ուժ, որը հանգեցնում է խաղաղության»,- ասաց վարչապետը։
Ավելի վաղ տեղեկացրել էինք, որ եռակողմ հանդիպումից հետո Հայաստանի վարչապետ Նիկոլ Փաշինյանը, ԱՄՆ նախագահ Դոնալդ Թրամփը ու Ադրբեջանի նախագահ Իլհամ Ալիևը ստորագրել են հռչակագիր, որը վերաբերում է միջազգային բարեկեցության և խաղաղության Թրամփի ուղուն։
Հանդիպման ավարտից հետո Փաշինյանը գրառում է կատարել, նշելով․
«Ապագան այսօր է: Փառք նահատակներին և կեցցե՛ Հայաստանի Հանրապետությունը»։
