Սկանդալ ռուս-ադրբեջանական հարաբերություններում. Բաքուն չեղարկում է ՌԴ միջոցառումներն Ադրբեջանի տարածքում

Ռուսաստանի հետ պետական և մասնավոր խողովակներով համաձայնեցված միջոցառումները չեղարկվում են: Այս մասին հայտնում է ադրբեջանական APA գործակալությունը՝ հղում անելով Ադրբեջանի մշակույթի նախարարությանը։

«Հաշվի առնելով Եկատերինբուրգի մարզում ՌԴ իրավապահ մարմինների կողմից ադրբեջանցիների դիտավորյալ սպանությունները, ինչպես նաև բռնի գործողությունները՝ հիմնված նրանց ազգային պատկանելության վրա, և այն փաստը, որ նման դեպքերը վերջերս դարձել են համակարգված, Ադրբեջանում նախատեսված ռուսական մշակութային միջոցառումները, այդ թվում՝ համերգները, փառատոները, ներկայացումները, ցուցահանդեսները և այլն, չեղարկվում են»,- հայտարարել է նախարարությունը։

Թե մինչև երբ է գործելու այս արգելանքը՝ Բաքուն չի հստակեցնում։

Նախօրեին ՌԴ Անվտանգության դաշնային ծառայությունը Եկատերինբուրգում հատուկ գործողություն էր իրականացրել , որի ընթացքում երկու ադրբեջանցի սպանվել էր, մի քանիսը՝ ձերբակալվել։ Զոհերը կասկածվում էին 2001 թվականին տեղի ունեցած սպանությանն առնչություններ ունենալու մեջ։

Ի պատասխան Բաքուն երեկ արտգործնախարարություն էր հրավիրել Ռուսաստանի ժամանակավոր հավատարմատար Պյոտր Վոլոկովիխին, պաշտոնական բողոք ներկայացրել։

Հիշեցնենք` հունիսի 27-ի առավոտյան իրավապահ մարմինների աշխատակիցները Եկատերինբուրգում գործողություն են իրականացրել մի քանի տասնյակ Ադրբեջանի բնիկ քաղաքացիների ձերբակալելու համար: Ինչպես հաղորդում է Trend-ը, խուզարկությունը տեղի է ունեցել տասից ավելի բնակարաններում, որտեղ բնակվում էին ադրբեջանցիներ: Ընդհանուր առմամբ, ըստ Ura.ru-ի, անվտանգության ուժերը ձերբակալել են ավելի քան 50 մարդու, որոնցից մի քանիսը հետագայում ազատ են արձակվել: