Մեղադրանք է առաջադրվել ՌԴ օգտին լրտեսություն կատարելու մեջ. նրանց մեջ կա ՀՀ քաղաքացի
Գերմանիայի դաշնային դատախազությունը մեղադրանք է առաջադրել Մայնի Ֆրանկֆուրտում գործունեություն ծավալած երեք ենթադրյալ լրտեսների դեմ, ովքեր գործել են Ռուսաստանի օգտին։ Այս մասին գրել է Deutsche Welle-ն:
Նրանք ըստ մեղադրող կողմի, վարձվել են ռուսական հատուկ ծառայությունների կողմից՝ Գերմանիայում նախկին ուկրաինացի զինվորականին լրտեսելու համար:
Դատախազության տվյալներով՝ մեղադրյալները Ուկրաինայի, Հայաստանի և Ռուսաստանի քաղաքացիներ են։ Նրանք մեղադրվում են առանձնապես ծանրացնող հանգամանքներով արտաքին հետախուզության համար աշխատելու մեջ։
2024 թվականի մայիսի սկզբին Հայաստանի քաղաքացին հանձնարարություն է ստացել ռուսական հատուկ ծառայությունից՝ Գերմանիայում հայտնաբերելու մի տղամարդու, ով Ուկրաինայի զինված ուժերի նախկին սպա է։ Հանձնարարականը կատարելու համար մեղադրյալը հավաքագրել է երկու ենթադրյալ հանցակիցների։
Հունիսի 19-ին նախատեսվել է, որ թիրախը կհրավիրվի հանդիպման Մայնի Ֆրանկֆուրտի կենտրոնում գտնվող սրճարանում։ Այնտեղ կասկածյալները պետք է լրացուցիչ տեղեկություններ հավաքեին ուկրաինացի նախկին սպայի մասին։ Սակայն, վերջինս նախօրոք դիմել է գերմանական ոստիկանություն և չի ներկայացել հանդիպմանը։ Կասկածյալները կալանավորվել են և այդ ժամանակվանից գտնվում են կալանքի տակ։
Դաշնային դատախազությունը ենթադրում է, որ հնարավոր է, որ խմբի նպատակը կարող էր լինել ուկրաինացի նախկին սպայի ոչնչացումը։
