Երբևէ չի սահմանափակվել Ադրբեջան այցելած որևէ փորձագետի մուտքը ՀՀ
Իմ տեղեկություններով, անցյալ անգամ նա խախտել էր հավատարմագրման կարգը և ըստ այդմ չէր հավատարմագրվել, սակայն այս անգամ պատշաճ հավատարմագրման պրոցեսը անցնելուց հետո նրա մուտքը Հայաստան իհարկե թույլատրվել է։ Այս մասին ասել է ԱԳՆ գլխավոր քարտուղար Դավիթ Կարապետյանը՝ անդրադառնալով նրան, որ փորձագետ Ջոշուա Կուչերան, որը Արցախյան պատերազմի ժամանակ Քարվաճառում է եղել և որի մուտքը արգելված է եղել, հիմա «Երևանյան երկխոսության» է մասնակցում։
«Ոչ միայն Ջոշուա Կուչերայի, այլ նաև մի այլ էքսպերտի մասով կար խոսակցություն։ Ես ուզում եմ շատ հաստատորեն նշել, որ Հայաստանը երբևէ չի սահմանափակել որևէ, հատկապես էքսպերտային շրջանակներից, մարդկանց մուտքը Հայաստան, որոնք այցելել են Ադրբեջան։ Ոչ նախկինում, ոչ ներկայումս չի սահմանափակվել Ադրբեջան այցելած որևէ էքսպերտի մուտքը Հայաստան։ Մենք պետք է կարողանանք աշխատել և պետք է աշխատենք նաև այն մարդկանց և հատկապես անալիտիկ վերլուծական կենտրոնների ներկայացուցիչների հետ, որոնք հնարավոր է՝ ունեն այլ կարծիք, դիրքորոշում մի շարք հարցերի վերաբերյալ։
Այս նմանատիպ ֆորումները և համաժողովները նաև նպատակ ունեն բացատրելու Հայաստանի կառավարության, Հայաստանի դիրքորոշումները շատ ավելի ամրապնդելու էն մարդկանց և էքսպերտային ոլորտի ներկայացուցիչների մոտ, ում հետ մենք աշխատում ենք և ով ընդհանրապես հետաքրքրված է մեր ռեգիոնով։ Մենք հակված չենք Հայաստան հրավիրել միայն այն մարդկանց, որոնք սիրում են Հայաստանը և գոհ են այն քաղաքականությամբ, որ վարում է Հայաստանը։ Մենք մեր քաղաքականությունը ուզում ենք բացատրել ավելի շատ, ավելի մեծ շերտերի»,–ասել է Կարապետյանը։
