ՏԵՍԱՆՅՈւԹ. Վարդևանյանը պահանջել է վերացնել Արթուր Սարգսյանի տնային կալանքը

ԱԺ 8-րդ գումարման և 9-րդ գումարման նորընտիր պատգամավոր Արթուր Սարգսյանի պաշտպան Արամ Վարդևանյանը դատարանում միջնորդել է վերացնել նրա նկատմամբ կիրառված տնային կալանքը՝ պնդելով, որ պատգամավորի ազատությունը կարող է սահմանափակվել միայն Ազգային ժողովի համաձայնությամբ։

«2026 թվականի հուլիսի 21-ից Արթուր Սարգսյանն ունի պատգամավորի կարգավիճակ։ Խնդրում եմ հրատապության կարգով լուծել այս հարցը, որովհետև Մխիթար Զաքարյանի գործով Վճռաբեկ դատարանը իրավունքի խախտում է ճանաչել հենց այն հիմքով, որ պատգամավորի կարգավիճակ ստանալու պահից նա ազատ չէր արձակվել»,- դատարանում հայտարարել է Վարդևանյանը։

Փաստաբանը նշել է, որ Կենտրոնական ընտրական հանձնաժողովի վերջին որոշումը ևս վկայում է, որ Արթուր Սարգսյանն արդեն պատգամավորի կարգավիճակ ունի, և, Սահմանադրական դատարանի որոշումների համաձայն, նա պետք է անհապաղ ազատ արձակվի տնային կալանքից։

Ի պատասխան՝ դատարանը հայտնել է, որ պաշտպանի ներկայացրած երկու հարցերն էլ կքննարկվեն այսօրվա դատական նիստի ընթացքում։