Մեծ Բրիտանիան փակել է Թեհրանում իր դեսպանատունը, Ֆրանսիան հետ է կանչել Իրանում գտնվող դիվանագետներին

Մեծ Բրիտանիան ժամանակավորապես հետ է կանչել Իրանում գտնվող իր դիվանագիտական անձնակազմին՝ պատճառաբանելով տարածաշրջանում անվտանգության իրավիճակի վատթարացումը։ Միաժամանակ Մեծ Բրիտանիայի արտաքին գործերի նախարարությունը խորհուրդ է տվել զերծ մնալ Իրան մեկնելուց՝ զգուշացնելով, որ բրիտանական անձնագիր ունենալը կամ Մեծ Բրիտանիայի հետ կապերը կարող են բավարար հիմք դառնալ իրանական իշխանությունների կողմից անձանց ձերբակալելու համար։ Դեսպանատունը, ըստ Լոնդոնի, շարունակում է աշխատել հեռավար ռեժիմով։

Միաժամանակ իրանական Tasnim գործակալությունը հայտնել է, որ անվտանգության նկատառումներից ելնելով Ֆրանսիան նույնպես տարհանել է Թեհրանում գտնվող իր դիվանագիտական անձնակազմին։

Այս քայլերը հաջորդել են ԱՄՆ նախագահ Դոնալդ Թրամփի վերջին հայտարարություններին, որոնցում նա սպառնացել է հարվածներ հասցնել Իրանի կամուրջներին և էլեկտրակայաններին՝ ի պատասխան Օրմուզի նեղուցում նավերի վրա իրականացվող հարձակումների։ Իրանը, իր հերթին, հայտարարել է, որ ԱՄՆ-ի հարձակման դեպքում թիրախավորելու է ամերիկյան և ԱՄՆ դաշնակիցների ռազմավարական օբյեկտները։