Եմենի հութիները հարվածել են սաուդյան տանկերներին, Թրամփը սպառնացել է պատասխան հարվածներով

Իրանի աջակցությունը վայելող Եմենի հութիները հայտարարել են, որ Կարմիր ծովում հարվածել են Սաուդյան Արաբիային պատկանող նավթատար տանկերներին։ CNN-ի փոխանցմամբ՝ NASA-ի արբանյակային լուսանկարներից երևում է, որ Սաուդյան Արաբիայի դրոշով ընթացող տանկերներից մեկի վրա հրդեհ է բռնկվել։ Սաուդյան իշխանությունների տվյալներով՝ անձնակազմը չի տուժել։

Հութիները հայտարարել են, որ շարունակելու են Սաուդյան Արաբիայի ծովային շրջափակումը, որը, նրանց խոսքով, պատասխան է արդեն շուրջ 12 տարի շարունակվող «անարդար և դաժան շրջափակմանը»։

ԱՄՆ նախագահ Դոնալդ Թրամփը հայտարարել է, որ Օրմուզի նեղուցում քաղաքացիական նավերի վրա յուրաքանչյուր հարձակման դեպքում ԱՄՆ-ը կհարվածի Իրանի ենթակառուցվածքներին՝ թիրախավորելով կամուրջներն ու էլեկտրակայանները։

Ի պատասխան՝ Թեհրանում հայտարարել են, որ նման հարվածների դեպքում կհարվածեն տարածաշրջանի ենթակառուցվածքներին, այդ թվում՝ էներգետիկ օբյեկտներին, որոնցում շահագրգռված են Միացյալ Նահանգները։ Իրանական Tasnim գործակալության փոխանցմամբ՝ իրանցի պաշտոնյան նաև ակնարկել է, որ Թեհրանը կշարունակի հարվածներ հասցնել այն նավերին, որոնք առանց Իրանի թույլտվության կփորձեն անցնել Օրմուզի նեղուցով։