Բաքվում՝ Ալիևի հետ հանդիպելուց հետո, Ուկրաինայի ԱԳ նախարարը մանրամասներ է հայտնել

Ուկրաինայի արտաքին գործերի նախարար Անդրեյ Սիբիգան Բաքվում հանդիպում է ունեցել Ադրբեջանի նախագահ Իլհամ Ալիևի հետ, հայտնում է «Европейская правда»-ն՝ հղում անելով Ուկրաինայի ԱԳՆ մամուլի ծառայությանը։

Հաղորդվում է, որ ուկրաինացի նախարարը և Ադրբեջանի նախագահը «բաց և մանրամասն զրույց» են ունեցել Ուկրաինայի և Ադրբեջանի միջև երկկողմ հարաբերությունների, ինչպես նաև միջազգային առկա հարցերի շուրջ։

«Բանակցությունների ընթացքում հատուկ ուշադրություն է դարձվել ռուսաստանյան ագրեսիայի դադարեցման և արդար ու տևական խաղաղության հաստատման հարցերին։

Սիբիգան շնորհակալություն է հայտնել Ալիևին Ուկրաինայի տարածքային ամբողջականության հետևողական աջակցության, ինչպես նաև մարդասիրական և էներգետիկ օգնության համար, որը Ադրբեջանը տրամադրել է Ուկրաինային ձմռան ամիսներին», - գրում է լրատվամիջոցը։

Առանձին նրանք քննարկել են երկու երկրների միջև ռազմավարական գործընկերության զարգացման հետագա քայլերը։

Ինչպես նշել է Ուկրաինայի ԱԳ նախարարը, «այս ճանապարհին կարևոր հանգրվան կդառնա Ուկրաինայի վերականգնմանը նվիրված համաժողովին Ադրբեջանի մասնակցությունը, որը տեղի կունենա հուլիսի 10-11-ը Հռոմում»։