Ամենակարևորը մեր երկրի դիրքորոշումն է. Զախարովա

Ռուսաստանը գործում է համակարգված՝ Ուկրաինական կարգավորման հարցերում իր դիրքորոշման հունով: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

Նա նշել է, որ Կիևն ընդհակառակը` անընդհատ փոխում է իր դիրքորոշումը։

«Ամենակարևորը մեր երկրի դիրքորոշումն է, որը հստակ արտահայտել է ՌԴ նախագահը 2024 թվականի հունիսի 14-ին։ Եվ տեսեք, թե որքան համակարգային, որքան սկզբունքային և որքան տրամաբանորեն է գործում մեր երկիրն այդ սկզբունքների հունով։ Եվ տեսեք, թե քանի անգամ է իր դիրքորոշումը փոխել Կիևի ռեժիմը։

Նույնիսկ ստամբուլյան բանակցություններից երևում էր․ առավոտյան մի բան էին ասում, երեկոյան՝ ուրիշ բան, հաջորդ առավոտ՝ երրորդ բանը, և այդպես շարունակ»,-ասել է Զախարովան:

Ռուսաստանը պատասխանատու դիրքորոշում է ցուցաբերում՝ հիմնված միջազգային իրավունքի, երկրի շահերի և, ընդհանուր առմամբ, ամբողջ տարածաշրջանի կայունության և անվտանգության վրա:

2024 թվականի հունիսին ՌԴ նախագահ Վլադիմիր Պուտինը ԱԳՆ ղեկավարության հետ հանդիպման ժամանակ հայտարարել էր, որ բանակցություններ սկսելու համար Ուկրաինան պետք է զորքերը դուրս բերի Ռուսաստանի նոր շրջանների՝ ԼԺՀ-ի, ԴԺՀ-ի, Խերսոնի և Զապորոժիեի մարզերի ամբողջ տարածքից, ինչպես նաև պաշտոնապես տեղեկացնի ՆԱՏՕ-ին անդամակցելու ծրագրերից հրաժարվելու մասին։