Ծառուկյանի՝ պետությանն անցած ընկերություններում կրճատումներ են. Տոնոյան

Երևան քաղաքի առաջին ատյանի ընդհանուր իրավասության դատարանի բակում լրագրողների հետ զրույցում ԲՀԿ խոսնակ Իվետա Տոնոյանը հայտնեց, որ Գագիկ Ծառուկյանին պատկանող ընկերություններից որևէ մեկի գործունեությունը չի վերականգնվել՝ բացի պետության կառավարմանը հանձնված «Արարատցեմենտից», Երևանի Արարատ կոնյակի-գինու-օղու կոմբինատից և Երևանի քաղաքապետարանին փոխանցված «Մուլտի Վելնեսից»։

Տոնոյանի խոսքով՝ մի շարք ահազանգեր են ստանում պետության կառավարմանն անցած ընկերություններում իրականացվող կրճատումների վերաբերյալ։

«Մենք ահազանգեր ենք ստանում, որ մասնավորապես Երևանի Արարատ կոնյակի-գինու-օղու կոմբինատի աշխատակիցների կրճատումներ են տեղի ունենում, հիմնավորումները հաստիքների կրճատման հիմքն է։ Խոսքն անվտանգության մի քանի տասնյակ աշխատակիցների մասին է, այլ բաժիններից էլ կան»,– նշեց Տոնոյանը՝ անդրադառնալով այն լուրերին, թե կրճատվում են այն աշխատակիցները, որոնք հանդես են եկել ի աջակցություն Գագիկ Ծառուկյանի։