Կդադարեն արդյոք 2 ամյա երեխայի որոնողական աշխատանքները
Մայիսի 4-ից անհետ կորած համարվող 2 ամյա երեխային 13 օրից ավելի է, չեն կարողանում գտնել, և այս պահի դրությամբ ո՛չ նորություն կա, ո՛չ ռեալ վարկած, թե ի՞նչ է կատարվել փոքրիկի հետ։ Այս մասին MediaHub–ին հայտնել են ՆԳՆ-ից:
ՆԳՆ Փրկարար ծառայության և Ոստիկանության ծառայողները որոնողական աշխատանքներն իրականացում են ինչպես Մարմարիկ բնակավայրում և հարակից տարածքներում, այնպես էլ Մարմարիկ գետի երկայնքով և Աղբյուրակի ջրամբարում։
«Որոնողական աշխատանքները շարունակվում են, չնայած, որ 10 օրից ավել է անցել»,- ասել են ՆԳՆ–ից։
Նշենք` որոնողական աշխատանքները, հիմնականում, դադարեցվում են 10 օր հետո։
ՆԳՆ-ից նաև նշել են, որ որոնողական աշխատանքներում օգտագործվում են դրոններ, ջրասուզակներն օրվա ընթացքում մի քանի անգամ սուզվում են, փրկարար ծառայողները գետի երկայնքով և հարակից տարածքներում որոնողական աշխատանքներ են իրականացնում:
