Պեսկովը` Կիևի կողմից ներկայացրած մեղադրանքների մասին
Կրեմլի խոսնակը հերքել է Չինաստանը ռուս-ուկրաինական հակամարտության մեջ ներքաշելու համար Մոսկվային Կիևի ներկայացրած մեղադրանքները։ Դմիտրի Պեսկովն ընդգծել է, որ Պեկինը հավասարակշռված քաղաքականություն է վարում։
Ավելի վաղ Վոլոդիմիր Զելենսկին հայտնել էր, որ Դոնեցկի շրջանում Ուկրաինայի զինված ուժերը գերի են վերցրել չինացի երկու զինվորականի, որոնք կռվել են Ռուսաստանի կողմից: Նրա խոսքով՝ Ռուսաստանի զինված ուժերի կազմում Ուկրաինայի դեմ առնվազն 155 չինացի է կռվում: Զելենսկին հավելել է, որ ռուսական կողմը Չինաստանի քաղաքացիներին հավաքագրում է հիմնականում TikTok-ի միջոցով։
Չինաստանի ԱԳՆ-ն, արձագանքելով Կիևից հնչող հայտարարություններին, հավատացրել է՝ Պեկինը զինվորականներ չի ուղարկել ռուս-ուկրաինական պատերազմին մասնակցելու համար:
