Միակողմանի ահաբեկո՞ւմ. պատասխան միջոցներ կլինեն. Չինաստան
Չինաստանը դեմ է ԱՄՆ-ի կողմից ներմուծվող չինական ապրանքների համար մաքսատուրքերի սահմանմանը և պատասխան միջոցներ կձեռնարկի: Այս մասին ասել է Չինաստանի առևտրի նախարարության ներկայացուցիչը:
«Չինաստանը կտրականապես դեմ է դրան և հակաքայլեր կձեռնարկի սեփական իրավունքներն ու շահերը պաշտպանելու համար»,- նշվում է նախարարության հայտարարության մեջ։
Ըստ հայտարարության՝ «նման մոտեցումը անտեսում է շահերի հավասարակշռությունը, որը ձեռք է բերվել բազմակողմ առևտրային բանակցություններում երկար տարիների ընթացքում»։
«Սա միակողմանի ահաբեկման տիպիկ պրակտիկա է ...: Առևտրային պատերազմներում հաղթողներ չկան, իսկ պրոտեկցիոնիզմը ելք չունի»,- ընդգծել է չինացի պաշտոնյան։
Պատմությունն ապացուցել է, ասել է նա, որ մաքսատուրքերի բարձրացումը չի լուծի ԱՄՆ-ի սեփական խնդիրները։
«Սա ոչ միայն կվնասի նրանց սեփական շահերին, այլև կվտանգի համաշխարհային տնտեսական զարգացումը և արտադրական ու մատակարարման շղթաների կայունությունը»,- նշել են Առևտրի նախարարությունից։
Չինաստանը ԱՄՆ-ին կոչ է անում «անհապաղ չեղարկել միակողմանի մաքսատուրքերը և պատշաճ կերպով լուծել տարաձայնությունները՝ առևտրային գործընկերների հետ հավասար երկխոսության միջոցով»։
Ինչպես լրագրողներին հաստատել է Սպիտակ տան մամուլի քարտուղար Քերոլայն Լևիթը, ԱՄՆ նախագահ Դոնալդ Թրամփը 34 տոկոս պատասխան մաքսատուրք է սահմանում չինական բոլոր ապրանքների վրա՝ ներմուծվող չինական ապրանքների ընդհանուր մաքսատուրքը հասցնելով 54 տոկոսի։
Թրամփն ավելի վաղ Չինաստանից ներկրվող ապրանքների համար 20 տոկոս մաքսատուրք էր սահմանել՝ Պեկինին խրախուսելու համար սահմանափակել ֆենտանիլի մատակարարումն ԱՄՆ։
2024 թվականին Միացյալ Նահանգները Չինաստանից ներմուծել է 439 միլիարդ դոլարի ապրանք, որը ներմուծման երկրորդ ամենամեծ աղբյուրն է Մեքսիկայից հետո:
