Ուժգին երկրաշարժի հետևանքով կան փլուզումներ. Թաիլանդ

Երկրաշարժի էպիկենտրոնը գտնվել է Մյանմայում, սակայն ցնցումները զգացվել են Թաիլանդի որոշ հատվածներում, մասնավորապես՝ մայրաքաղաքում։ Բանգկոկում մարդիկ շենքերից դուրս են եկել ու փողոց վազել։

Մյանմայում 7,7 մագնիտուդ երկրաշարժ է տեղի ունեցել, հայտնում է ԱՄՆ երկրաբանական ծառայությունը։ Ցնցումները զգացվել են նաև Թաիլանդում։

Մյանմայում երկրաշարժի էպիկենտրոնը գտնվել է Սագաինգ քաղաքից 16 կմ հեռավորության վրա՝ 10 կմ խորության վրա։ Մի քանի րոպե անց 6,9 մագնիտուդով հերթական երկրաշարժն է գրանցվել։

Bangkok Post-ը հայտնում է, որ Թաիլանդի հյուսիսում տեղի է ունեցել 4,2 մագնիտուդ երկրաշարժ, իսկ Բանգկոկի Չատուչակ շրջանում փլուզվել է կառուցվող բարձրահարկ շենքը։ Associated Press-ը հայտնում է, որ Թաիլանդի մայրաքաղաքի բարձրահարկ շենքերը տարհանվել են երկրաշարժի պատճառով։ Շենքերից ու հյուրանոցներից տարհանված հազարավոր մարդիկ շարունակում են մնալ փողոցներում։

Թաիլանդի վարչապետ Ֆեթոնգթան Շինավաթան Բանգկոկում արտակարգ դրություն է հայտարարել հարեւան Մյանմայում տեղի ունեցած հզոր երկրաշարժից հետո։ Այս մասին հայտնում է Agence France-Presse-ը։

Չինաստանի երկրաշարժերի վարչությունը երկրաշարժի ուժգնությունը գնահատել է 7,9 մագնիտուդ։

Ցնցումները զգացվել են հարեւան Չինաստանում և Թաիլանդում։

Բանգկոկում, մասնավորապես, փլուզվել է կառուցվող շենքը, իսկ մայրաքաղաքի բարձրահարկ շենքերի բնակիչներին կոչ են արել լքել իրենց տները։