Կառավարությունը պետք է հրաժարական տա. լարված իրավիճակ՝ Թուրքիայում

Թուրքիայում զանգվածային բողոքի ցույցերը շարունակվում են:

Երթերի և ցույցերի մասնակիցները պահանջում են ազատ արձակել Ստամբուլի քաղաքապետի պաշտոնից հեռացված և կալանավորված Էքրեմ Իմամօղլուին:

«Մենք Մուստաֆա Քեմալի զինվորներն ենք», «Իրավունք, օրենք, արդարություն», «Կառավարությունը պետք է հրաժարական տա»,-  վանկարկել են ցուցարարները։

Ստամբուլում ակտիվիստներից մեկը հենց բողոքի ակցիայի ժամանակ պատռել է Էրդողանի «Ավելի արդար աշխարհ հնարավոր է» գիրքը (թուրք առաջնորդը ոչ վաղ անցյալում այդ գրքի մի օրինակ նվիրել էր Հայաստանի վարչապետ Նիկոլ Փաշինյանին)։ Իսկ Էսքիշեհիրում ցուցարարները կազմակերպել են թուրք ազգայնականների առաջնորդ և Էրդողանի զինակից Դևլեթ Բահչելիի խորհրդանշական հուղարկավորությունը։ 

Ընդդիմության տվյալներով՝ միայն Ստամբուլում փողոց է դուրս եկել մոտ մեկ միլիոն մարդ` չնայած նրան, որ իշխանությունները Ստամբուլում հավաք անցկացնելու արգելքը երկարաձգել են մինչև մարտի 27-ը։