ԵՄ-ն անհանգստացած է Ստամբուլի քաղաքապետի ձերբակալությամբ
Եվրահանձնաժողովի նախագահ Ուրսուլա ֆոն դեր Լայնը մտահոգություն է հայտնել ընդդիմադիր թուրք քաղաքական գործիչ և Ստամբուլի քաղաքապետ Էքրեմ Իմամօղլուի ձերբակալության կապակցությամբ և կոչ է արել Թուրքիային հարգել ժողովրդավարական արժեքները։
«Քաղաքապետի ձերբակալությունը խորապես մտահոգիչ է: Որպես Եվրախորհրդի անդամ և ԵՄ անդամակցության թեկնածու, Թուրքիան պետք է հարգի ժողովրդավարական արժեքները, հատկապես ընտրված պաշտոնյաների իրավունքները»,- Բրյուսելում կայացած մամուլի ասուլիսում ասել է ֆոն դեր Լայնը։
Նրա խոսքով, Թուրքիան պետք է հավատարիմ մնա ժողովրդավարության հիմնարար սկզբունքներին։
Ավելի վաղ հայտնել էինք, որ ընդդիմադիր քաղաքապետին ձերբակալել են կոռուպցիոն գործով: Բացի նրանից, ավելի քան 100 մարդու ձերբակալման օրդեր է տրվել, այդ թվում՝ պետծառայողների, քաղաքական ակտիվիստների, լրագրողների և գործարարների: Ընդդիմադիր Ժողովրդահանրապետական կուսակցության ղեկավար Օզգյուր Օզելը դա որակել է հեղաշրջման փորձ և կողմնակիցներին հորդորել է դուրս գալ փողոց:
