Ռուսաստանի վրա ճնշումը կմեծանա․ Ֆոն դեր Լյայենը կոշտ ուղերձ է հղել Մոսկվային

Եվրոպական հանձնաժողովի նախագահ Ուրսուլա ֆոն դեր Լյայենը Գերմանիայի Լայպցիգ քաղաքում տեղի ունեցած ահաբեկչական հարձակումը բնորոշել է որպես Եվրամիության տարածքում էսկալացիայի նոր փուլ: Այս մասին նա հայտարարել է ՆԱՏՕ-ի գլխավոր քարտուղար Մարկ Ռյուտեի հետ համատեղ մամուլի ասուլիսի ընթացքում, ինչպես հաղորդում է The Guardian պարբերականը:

Եվրահանձնաժողովի ղեկավարի խոսքով՝ հարձակումն իրականացվել է ռազմական տեխնիկայի կիրառմամբ, որի հետևում, ըստ նրա, կանգնած են ռուսական գործակալները: Ֆոն դեր Լյայենը նշել է, որ ծրագրի հաջողության դեպքում այն կարող էր հանգեցնել մարդկային զոհերի և զգալի նյութական վնասների՝ ընդգծելով, որ դաշինքը նման գործողություններ չի հանդուրժելու։

Բրյուսելի ներկայացուցիչը շեշտել է, որ Եվրոպային ահաբեկելու ցանկացած փորձ որևէ կերպ չի ազդի Ուկրաինային ցուցաբերվող աջակցության վրա, այլ ընդհակառակը՝ կամրապնդի գործընկերների վճռականությունը:

Նա նաև հանդես է եկել Մոսկվայի նկատմամբ պատժամիջոցների ռեժիմն էլ ավելի խստացնելու կոչով՝ շեշտելով բոլոր հնարավոր շրջանցման ուղիները փակելու անհրաժեշտությունը։ Ֆոն դեր Լյայենի պնդմամբ՝ Եվրամիությունն ու Հյուսիսատլանտյան դաշինքը ոչ միայն պահպանելու, այլև աստիճանաբար ուժեղացնելու են Ռուսաստանի վրա գործադրվող ճնշումը։